ಹುಡುಕಾಟ...

ನಡೆದ ನಾ ಅವನ ಹುಡುಕುತ್ತಾ, ಸಿಗದ ಸ್ವಪ್ನವ ಮೆಲಕು ಹಾಕುತ್ತಾ,

ಎಂದೋ ಕಂಡ ಕನಸು, ಎಂದೋ ನುಡಿದ ಮಾತು

ಮನದಲಿ ಬಚ್ಚಿಟ್ಟ ಪ್ರೀತಿಗೆ, ಕಾಲದ ಪರದೆ…

ಅಲ್ಲೊಂದು ತಿರುವಿನಲ್ಲಿ, ನಿಶೆಯ ಬೆಳಕಿನಲಿ, ನನ್ನವನ ಆಗಮನ!!

ಯಾವ ಕಿನ್ನರನೂ ಅಲ್ಲ, ಯಾವ ಗಂಧರ್ವನೂ ಅಲ್ಲ, ಅವರ್ಯಾರು ನನ್ನವನ ಎದುರು ನಿಲ್ಲುವಂತಿಲ್ಲ

ಕೋಟಿ ಚುಕ್ಕಿಗಳು ಇಣುಕಿದವು, ನನ್ನವನ ಕಿರುನಗೆಯ ಬಯಸಿದವು

ಸ್ವಪ್ನ ಲೋಕದ ಆಶಗೊಪುರದಲ್ಲಿ, ನಾನಾದೆ ಅವನ ಚಕೋರಿ

ಬೇಕು ಬೇಡಗಳ ಪರಿವಿಲ್ಲದೆ, ಪ್ರೀತಿಯ ಆಲಾಪನೆಯಲಿ ಮುಳುಗಿದ್ದೆ

ಒಂದಿಷ್ಟು ದೂರದ ಅವನ ಸಾಂಗತ್ಯ, ಬೇಕೆನಿಸಿತು ಅವನದೇ ಸಾಮಿಪ್ಯ

ಪ್ರೀತಿ ಪ್ರೇಮದ ಗುಂಗಿನಲಿ, ನಾನದೆ ಅವನ ರಾಧೇ… ಹೌದು, ನಾನೇ ಅವನ ರಾಧೇ!!

ಧೋ ಎಂದು ಸುರಿವ ಮಳೆಯಲಿ, ಅವನೊಡನೆ ಎರಡೆಜ್ಜೆ,

ಎರಡೆಜ್ಜೆಗೇ ಕದಡಿದ ನನ್ನವ, ನನ್ನಲ್ಲಿರೋ ಲಜ್ಜೆ-ಗೆಜ್ಜೆ,

ಚಿಟ ಪಟ ಹನಿಗಳ ಸದ್ದು ಹೊರಗೆ; ಒಲವ ಮಿಡಿತ ನನ್ನೊಳಗೆ,

ಕೊರೆವ ಚಳಿಗೆ, ಅವನ ಬಿಸಿ ಉಸಿರ ಕಾವು, ಸದಾ ಕಾಡುವುದು ಅವನ ನೆನಪುಗಳ ನೋವು!!               

ನಡೆದ ನಾ ಅವನ ಹುಡುಕುತ್ತಾ, ಸಿಗದ ಸ್ವಪ್ನವ ಮೆಲಕು ಹಾಕುತ್ತಾ,

ಮನದಲಿ ಬಚ್ಚಿಟ್ಟ ಪ್ರೀತಿಗೆ, ಕಾಲವೇ ಸರಿಸಿತು ಪರದೆ!!

ಏನೆಂದು ಹುಡುಕಲಿ ನಿನ್ನ. ಹೇಗಿನ್ನು ಮರೆಯಲಿ ನಿನ್ನ,

ಪ್ರೀತಿ ಪ್ರೇಮದ ಗುಂಗಿನಲಿ, ನಾನದೆ ನಿನ್ನ ರಾಧೇ… ನಾನೇ ನಿನ್ನ ಪ್ರೀತಿಯ ರಾಧೇ!!